(Bang-e-Dra-107) Raat Aur Shayar

Raat Aur Shayar
(1)
Raat

Kyun Meri Chandni Mein Phirta Hai Tu Preshan
Khamosh Soorat-e-Gul, Manind-e-Bu Preshan

Taron Ke Moutiyon Ka Shaid Hai Jouhari Tu
Machli Hai Koi Mere Darya-e-Noor Ki Tu

Ya Tu Meri Jabeen Ka Tara Gira Huwa Hai
Riffat Ko Chor Kar Jo Pasti Mein Ja Basa Hai

Khamosh Ho Gya Hai Tar-e-Rabab–E-Hasti
Hai Mere Aaeene Mein Tasveer-e-Khawab-e-Hasti

Darya Ki Teh Mein Chashm-e-Gard Ab So Gyi Hai
Sahil Se Lag Ke Mouj-e-Betaab So Gyi Hai

Basti Zameen Ki Kaisi Hangama Afreen Hai
Yun So Gyi Hai Jaise Abad Hi Nahin Hai

Shayar Ka Dil Hai Lekin Na-Ashna Sukoon Se
Azad Reh Gya Tu Kyunkar Mere Fusoon Se

(2)
Shayar

Main Tere Chand Ki Khaiti Mein Guhar Bota Hun
Chup Ke Insanon Se Manind-e-Sehar  Rota Hun

Din Ki Sourish Mein Niklte Huwe Ghabrate Hain
Uzlat-e-Shab Mein Mere Ashk Tapak Jate Hain

Mujh Mein Faryad Jo Pinhan Hai, Sunaon Kis Ko
Tapish-e-Shauq Ka Nazzara Dikhaon Kis Ko

Barq-e-Aeman  Mere Seene Pe Pari Roti Hai
Dekhne Wali Hai Jo Ankh, Kahan Soti Hai!

Sift-e-Shama-e-Lehd Murda Hai Mehfil Meri
Ah, Ae Raat! Bari Door Hai Manzil Meri

Ehd-e-Hazir Ki Hawa Raas Nahin Hai Iss Ko
Apne Nuksan Ka Ehsas Nahin Hai Iss Ko

Zabt-e-Pegham-e-Mohabbat Se Ghabrata Hun
Tere Tabindah Sitaron Ko Suna Jata Hun