(Bang-e-Dra-124) Shayar

Shayar

Jooye Surood Afreen Ati Hai Kohsar Se
Pi Ke Sharab-e-Lala Goon Mai Kada-e-Bahar Se

Mast-e-Mai-e-Kharaam Ka Sun To Zara Payam Tu
Zinda Wohi Hai Kaam Kuch Jis Ko Nahin Qarar Se

Phirti Hai Wadiyon Mein Kya Dukhtar-e-Khush Kharaam-e-Abar
Karti Hai Ishq Baziyan Sabza-e-Murghzar Se

Jaam-e-Sharab Koh Ke Khum Kade Se Urati Hai
Past-o-Buland Kar Ke Tae Khaiton Ko Ja Pilati Hai

Shayar-e-Dil Nawaz Bhi Baat Agar Kahe Khari
Hoti Hai Uss Ke Faiz Se Mazra-e-Zindagi Hari

Shan-e-Khalil Hoti Hai Uss Ke Kalam Se Ayan
Karti Hai Uss Ki Qoum Jab Apna Shiaar Azari

Ahl-e-Zameen Ko Nuskha-e-Zindagi-e-Dawam Hai
Khoon-e-Jigr Se Tarbiat Pati Hai Jo Sukhanwari

Gulshan-e-Dehr Mein Agar Jooye Mai-e-Sukhan Na Ho
Phool Na Ho, Kali Na Ho, Sabza Na Ho, Chaman Na Ho