(Zarb-e-Kaleem-043) Mehdi-e-BarHaq

Mahdi-e-Barhaq

Sub Apne Banaye Huwe Zindan Mein Hain Mehboos
Khawar Ke Sawabit Hon Ke Afrang Ke Sayyar

Peeran-e-Kalisa Hon Ke Sheikhan-e-Haram Hon
Ne Jiddat-e-Guftar Hai, Ne Jiddat-e-Kirdar

Hain Ahle-e-Siasat Ke Wohi Kuhna Kham-o-Paich
Shayar Issi Aflas-e-Takhiyyul Mein Giraftar

Dunya Ko Hai Uss Mahdi-e-Barhaq Ki Zaroorat
Ho Jis Ki Nigah Zalzala-e-Alam-e-Afkar