(Zarb-e-Kaleem-119) Nigah-e-Shauq

Nigah-e-Shauq

Ye Kainat Chupati Nahin Zameer Apna
Ke Zarre Zarre Mein Hai Zauq-e-Ashkarayi

Kuch Aur Hi Nazar Ata Hai Karobar-e-Jahan
Nigah-e-Shauq Agar Ho Shareek-e-Beenai

Issi Nigah Se Mehkoom Qoum Ke Farzand
Huwe Jahan Mein Sazawar-e-Kaar Farmayi

Issi Nigah Mein Hai Qahiri-o-Jabari
Issi Nigah Mein Hai Dilbari-o-Raanai

Issi Nigah Se Har Zarre Ko, Junoon Mera
Sikha Raha Hai Reh-o-Rasm-e-Dasht-e-Pemai

Nigah-e-Shauq Mayassr Nahin Agar Tujh Ko
Tera Wujood Hai Qalb-o-Nazar Ki Ruswai