(Bang-e-Dra-061) Sakhtiyan Kerta Hun Dil Per, Ghair Se Ghafil Hun Mein

Sakhtiyan Karta Hun Dil Par, Ghair Se Ghafil Hun Main
Haye Kya Achi Kehi Zalim Hun Main, Jahil Hun Main

Main Jabhi Tak Tha Ke Teri Jalwa Pairayi Na Thi
Jo Namood-e-Haq Se Mit Jata Hai Woh Batil Hun Main

Ilm Ke Darya Se Nikle Ghota Zan Gohar Badast
Waye Mehroomi! Khazaf Chain-e-Lab Sahil Hun Main

Hai Meri Dillat Hi Kuch Meri Sharafat Ki Daleel
Jis Ki Ghaflat Ko Malak Rote Hain Woh Ghafil Hun Mein

Bazm-e-Hasti ! Apni Araaish Pe Tu Nazaan Na Ho
Tu To Ek Tasveer Hai Mehfil Ki Aur Mehfil Hun Main

Dhoonta Phirta Hun Ae Iqbal Apne App Ko
App Hi Goya Musafir, App Hi Manzil Hun Mein