(Bang-e-Dra-083) Payam-e-Ishq

Payam-e-Ishq

Sun Ae Talabgaar-e-Dard-e-Pehlu! Main Naaz Hun, Tu Niaz Ho Ja
Main Ghaznavi Soumanat-e-Dil Ka Hum Tu Sarapa Ayaz Ho Ja

Nahin Hai Wabasta Zair-e-Gurdoon Kamal Shan-e-Sikandari Se
Tamam Saman Hai Tere Seene Mein, Tu Bhi Aaeena Saaz Ho Ja

Garz Hai Paikar-e-Zindagi Se Kamal Paye Hilal Tera
Jahan Ka Farz-e-Qadeem Hai Tu, Ada Misal-e-Namaz Ho Ja

Na Ho Qinaat Shuar Gulcheen! Issi  Se Qayam Hai Shan Teri
Wafoor-e-Gul Hai Agar Chaman Mein To Aur Daman Daraz Ho Ja

Gye Woh Ayyam, Ab Zamana Nahin Hai Sehra Nawardiyon Ka
Jahan Mein Manind-e-Shama Souzan Miyan-e-Mehfil Gudaz Ho Ja

Wujood Afrad Ka Majazi Hai, Hasti-e-Qoum Hai Haqeeqi
Fida Ho Millat Pe Yani Atish Zan-e-Tilism-e-Majaaz Ho Ja

Ye Hind Ke Firqa Saaz Iqbal Azari Kar Rahe Hain Goya
Bacha Ke Daman Buton Se Apna Gubar-e-Rah-e-Hijaz Ho Ja